Na 15. mjezynarodnej rězbarskej dźěłarničce hotuja so na finisažu,byrnjež cyle dodźěłane njebyło
Wuměłče a wuměłcy 15. mjezynarodneje rězbarskeje dźěłarnički w Miłočanskej skale Při Krabatowym kamjenju hotuja so na finisažu. Tam chcedźa zajutřišim swoje twórby prezentować, kotrež su w minjenymaj tydźenjomaj nastali. Někotre skulptury a plastiki su hižo hotowe, na tamnych poslednje kontury hišće formuja.
Zakónčenje ryzy wuměłstwoweho dźěła pak njewoznamjenja, zo móža akterojo ruce do klina złožić. Nawopak – po dźěle je do dźěła, kaž tak rjenje rěka. „Hižo prawy podstołp (Sockel) nańć je často wulke wužadanje. Žana skulptura njeje dospołna, doniž njeje jasne, na čim steji. Nimo toho dyrbimy pruwować, kotry spódk a kotre městno je za nje najkmańše“, su sej wobdźělnicy přezjedni. Předewšěm drjewjane twórby dźě njemóža na prostej zemi stać – přewulki je strach, zo k zhniliznje dochadźa a zo počinaja so hriby zaměstnić.