Sydom chórow jubilejny koncert w Delnim Wujězdźe wuhotowało
Delni Wujězd (SN/JaW). Dwurěčny chórowy koncert wosebiteho razu dožiwichu zajimcy sobotu w Delnjowujězdźanskim kupowym parku. Cyłkownje sydom spěwnych ćělesow je tam wjace hač 300 hosćom dohlad do swojeho spěwneho zamóženja dało. Z koncertom zhladowachu na 140. róčnicu wobstaća Delnjowujězdźanskeho muskeho chóra.
Hižo při dwurěčnym němsko-serbskim witanju přećelow ludoweho a wuměłskeho spěwa we wulkim stanje bě jasne, zo su organizatorojo wulku wažnosć na serbskosć kładli. Tak zaspěwa wšitke sydom sobuskutkowacych spěwnych cyłkow k zazběhej koncerta – muske chóry z Łaza, Rózborka (Rothenburg), Mužakowa, Dubca (Daubitz) a muski chór Delany kaž tež Hamorski gmejnski chór jako jenički žónski chór běchu přeprošenje jubilara z Delnjeho Wujězda na koncertowanje sćěhowali – zhromadnje serbsku witansku pěsničku „Witajće, hosćo“. Ju bě wuměłstwowy nawoda domjaceho muskeho chóra Wolfgang Frister ekstra za sobotny jubilejny koncert spisał.