Wuměłcy Serbskeho ludoweho ansambla chcedźa so wědomje ludej přibližić a so sylnišo na serbske a dwurěčne wsy podawać, zo bychu ludźi lěpje docpěli.

Budyšin (SN/JaW). 15 premjerow a z nich štyri prapremjery planuje Serbski ludowy ansambl w nowej hrajnej dobje 2021/2022. To zdźěli nowy intendant Tomaš­ Kreibich-Nawka wčera w Budyšinje žurnalistam na nowinarskej konferency w bašće SLA.

„Jako nowy nawoda najprjedy chcu, zo zaso měr do domu zaćehnje. Trjebamy zawodnu klimu, w kotrejž so wšitke sobudźěłaćerki a wšitcy sobudźěłaćerjo derje čuja, štož budźe wulke wužadanje“, zwurazni Kreibich-Nawka, prašany za předstawami a wizijemi do přichoda. Te wšak wón tež ma, nochcyše pak so přejara wo swojich zaměrach wuprajić. Wšako wón hakle měsac ansambl nawjeduje. „Na kóždy pad chcu, zo so SLA zaso sylnišo ludej zbliži. Docpěć chcu to z mjeńšimi wuměłstwowymi formatami, kotrež móžemy tež na wsach pokazować. Chcemy wšak zaso bóle ludźi docpěć, kotřiž­ so hewak njebychu do Budyšina na předstajenje SLA podali. Skrućić chcu tak tež zwisk k stajnemu publikumej.“