Korzym (SN/at). Młoda pygmejska mać je zadwělowana. Wona přisłuša etniskej mjeńšinje we wuchodnym Kamerunje, kotraž sydli w dešćowym lěsu. Dokelž tam wukrajne koncerny štomy trjebja, wuhnachu Pygmejow a zasydlichu jich blisko dróhow w pomocnych kwartěrach bjez wody, swěcy abo šulow a bjez pjenjez. W tajkej bědźe žona synka ćěši. Hnujace to foto we wustajeńcy „Kamerun z wočemi tysac žonow“, kotruž su wčera we wobłuku Łužiskeho festiwala w Korzymskej galeriji Flox wotewrěli.
Přehladka je pokłonjenje před sylnosću afriskich žonow a zarjaduje so do prócowanjow Hornjeje Łužicy wo partnerstwo z Afriku, předewšěm z jeje žonami. Widźeć su horde, njelochki wšědny dźeń zmištrowace wosobiny. Kaž iniciator prof. Matthias Theodor Vogt ze Zhorjelskeho Instituta za kulturnu infrastrukturu Sakskeje na wčerawšim wotewrjenju wuzběhny, steja Kamerunjenjo nastupajo zajim za cuzu rěč němčinu a za naš kraj w Africe na třećim městnje. Tuž měli tamnišim žonam přichileni być.
