Budyšin (SN/MkWj). Sakska policija chce wot oktobra tež dwurěčnje wo policajski dorost wabić. Wotpowědnu kampanju je sakski nutřkowny minister Roland Wöller (CDU) wčera w Budyšinje předstajił. Na Póstowym naměsće před Serbskim domom wotkry wón wulki wobraz z logom kampanje. Přitomni běchu mjez druhim předsyda Domowiny Dawid ­Statnik, zapósłancaj CDU w Sakskim ­krajnym sejmje Marko Šiman a Alojs ­Mikławšk kaž tež nawodaj Zhorjelskeho a Budyskeho policajskeho rewěra Manfred Weißbach a Mario Steiner.

Roland Wöller měješe dwě dobrej powěsći: Sakska policija nuznje dorost pyta. Krajny sejm bě wobzamknył, 1 000 přidatnych policistow přistajić. Hač do lěta 2023 ma ličba docpěta być. Nimo toho chce policija přichodnje we wjesnych kónčinach, potajkim tež w dwurěčnych, prezentna być. Serbska rěč jako „nošer kultury“, kaž minister rjekny, při tym wosebje wulku rólu hraje. Tomu wotpowědnje chcedźa z dwurěčnym wabjenskim logom tež na serbskich wsach wo dorost wabić. Wöller čuje so po swójskim wuprajenju jako bywši kultusowy minister ze serbskej rěču, kulturu a šulstwom wusko zwjazany.