Serbsku protyku 2022 w Malešecach předstajili

Malešecy (SN/CoR). Zhromadnje z Ludowym nakładnistwom Domowina bě Domowinska skupina Malešecy wčera wječor do tamnišeho hosćenca „Wódny muž“ na knižnu premjeru Serbskeje protyki 2022 přeprosyła, a něhdźe 30 ludźi je přewšo zajimawe předstajenje najnowšeho knižneho kalendra dožiwiło. Tónraz wěnuje so serbski bestseller Minakałej, wšako zhladuje wjes sewjernje Budyšina klětu na 700. róčnicu prěnjeho naspomnjenja. Premjera bě předstajenje serbskeje protyki zdobom za lektorku LND Janinu Mikławškowu, kotraž bě jeje nastaće prěni raz wot spočatka do kónca přewodźała. Jako „stary zajac“ – to je mjeztym wosme wudaće w jeho zamołwitosći – dźakowaše so zamołwity redaktor Pětr Šołta jej runje tak kaž awtoram za dobre zhromadne dźěło. „Wjeselu so hižo na mnohe dalše zhromadne Protyki“, rjekny Janina Mikławškowa.