Chórisća Lipy runje tak zahorili kaž młodźi spěwarjo

Pančicy-Kukow (SN/CoR). Něhdźe 300 zajimcow je wot nalěća přesunjeny wurjadny nazymski koncert chóra Lipa ­minjenu njedźelu popołdnju při miłym, hišće raz nimale lěćnym wjedrje do ze­žiwjenskeho a zeloweho centruma w klóštrje Marijinej hwězdźe w Pančicach-Kukowje zwabił. Zajim bě tak wulki, zo stólcy njedosahachu, štož pak ničo na přewšo dobrej naledźe přitomnych nje­změni. Wot prěnjeje štyrihłósnje přednjeseneje pěsnje „Zahraj nam“ su spěwarki a spěwarjo pod nawodom dirigentki Jadwigi Kaulfürstoweje swój publikum zahorili. K tomu přinošowaštaj zdobom Judith Pjetašec a Damian Dyrlich, kotrajž na lóštnje wašnje dwurěčnje po pro­gramje wjedźeštaj. W nim stejachu tónraz skerje tradicionelne ludowe spěwy w srje­dźišću. Najnowše nahrawanje za serbski rozhłós „Cyplkata Kata“ – nowa wersija serbskeho šlagra z 1960tych lět – pak wězo pobrachować njesmědźeše. Wo bóle moderne zynki a rytmy postara so chór Worklečanskeje wyšeje šule, kotryž spěwy ze swojeho musicala „Quo vadis – dokal dźeš?“ z lěta 2019 přednjese.