Nowy poskitk šulerjam spěchowanje dorosta SLA wudospołnja
Budyšin (SN/bn). Serbski ludowy ansambl wuhotuje z nowym formatom „Prózdniny z twojim instrumentom“ wosebity poskitk šulerkam a šulerjam 5. do 8. lětnika za čas bjez wučby. Wot předwčerawšeho chce dohromady třinaće wobdźělnikow swoje instrumentalne kmanosće pod nawodom nazhonitych powołanskich hudźbnikow rozšěrić a zlěpšować. „Prózdninske lěhwo“ wopřijima nimo ćežišćowych kursow za specifiske instrumenty – to su fleta, husle, cello, gitara, róžk a trompeta – wjacore dźěłarnički kaž tež hižo wotměty wopyt proby orchestra a baleta SLA za inscenaciju „Tam, hdźež tón měsačk swěći“.
