Berlin (dpa/SN). Do dźensa zahajaceho so wjerškoweho zetkanja čłonskich statow EU w Brüsselu su sej Zeleni wot zwjazkoweje kanclerki Angele Merkel (CDU) razniši kurs Pólskej napřećo žadali. Pólski ministerski prezident Mateusz Morawiecki wohroža čłonstwo swojeho kraja w EU a staja so tak přećiwo wjetšinje wobydlerjow, rjekny europska politikarka Zelenych Franziska Brantner powěsćerni dpa. „Je njezamołwite, zo je kanclerka Merkel jemu dale poboku, město toho zo by so z ludźimi solidarizowała.“
Zwada wo pólsku justicnu reformu a najnowši rozsud pólskeho wustawoweho sudnistwa k wobmjezowanemu nałožowanju prawa EU w Pólskej budźetej drje hłownej temje wjerška, kotryž so dźensa a jutře wotměwa. Prezidentka komisije EU Ursula von der Leyen bě Pólskej naposledk ze sankcijemi hrozyła. Angela Merkel chcyła porno tomu dialog pěstować. Wona chcyše so dźensa hišće do zahajenja wjerška z Morawieckim zetkać. Tón bě předwčerawšim, wutoru, w Brüsselu rozsud pólskeho wustawoweho sudnistwa zakitował a Europskeje uniji „wudrěwanje“ wumjetował.
