Wo lawdacijomaj a dźaknymaj narěčomaj na spožčenju Myta Ćišinskeho

Myto Ćišinskeho je najwyše wuznamjenjenje, kotrež Załožba za serbski lud w dwulětnym rytmusu zasłužbnym wosobinam resp. institucijam za wusahowace skutkowanje na polu serbskeje kultury, wuměłstwa a/abo wědomosće spožča. Lětsa je kuratorij, tuchwilu zestajany z dohromady wosom čłonkow a čłonow Domowiny, Maćicy Serbskeje, Zwjazka serbskich wuměłcow, Zwjazka serbskich spěwarskich towarstwow a Serbskeho šulskeho towarstwa, Budyskimaj mandźelskimaj Trudli a Janej Malinkec hłowne a Pančičansko-Kukowskimaj mandźelskimaj Jadwize a Fabianej Kaulfürstec spěchowanske myto přiznała, dotěrowane z 12 000 resp. 4 000 eurami. We wobłuku swjatočnosće minjenu sobotu su lawreatam wuznamjenjeni na žurli Budyskeho Serbskeho muzeja přepodali.