Projekt „Kak klinči domizna“ nabywa dźeń a jasnišich konturow

Drježdźany (SN/CoR). „Čehodla wěnujemy so wulkemu słowu ,domizna‘? No­chcemy zapřijeće tym tamnym přewostajić. A k sakskej domiznje słušeja tež migranća“, rjekny z Drježdźan pocha­dźacy a w Berlinje bydlacy spěwar Felix Räuber wčera wječor na dalšej mjezy­prezentaciji filmoweho-hudźbneho projekta „Kak klinči domizna?“ w sakskej stolicy. Na slědy dohromady dźesać „kultur­nych kruhow“ chcedźa so podać. Z wurězkami třoch hižo produkowanych epizodow z dokumentaciskeje serije su tam ně­hdźe 30 přitomnym, mjez nimi běchu tež někotři Serbja, „dohlad do labora“ dali. „Dźěłamy po principje ,work in progress‘, nimamy žadyn kruty sce­narij, ale na městnje nadeńdźemy tych ludźi, kotřiž so potom z našimi protagonistami stanu“, rozłoži Räuber. Dwanaćoch su w małej portretowej wustajeńcy wčera předstajili, mjez nimi bě tež křižer­­ski kantor Daniel Wjesela z Ralbic a čłon­ka Slepjanskeho towarstwa Kólesko Ju­liana Kaulfürstec.