Njebjelčicy (SN/pdź). Serbski sejm kritizuje raznje plan Energijoweho koncerna LEAG Miłoraz wotbagrować. LEAG mjeztym hižo prózdne a předate chěže w srjedźołužiskej wsy zwottorhuje. Hdźež je nětko hišće Miłoraz ma tak spěšnje kaž móžno brunicowa jama nastać, byrnjež wjacore wědomostne studije na trěbnosći wotbagrowanja wsy dwělowali. Němski institut za hospodarske slědźenje je hakle njedawno „Studiju k rewidowanju rewěroweho koncepta 2021 – zwužitkowanje wosebiteje přestrjenje Miłoraz njeje energijohospodarsce trěbne“ wozjewił, z kotrejž po měnjenju Serbskeho sejma „dalši raz z njewotwisneje strony pokazuja, zo wuhlo pod Miłorazom kónca brunicy dla hižo trěbne njeje“, informuje sejm w nowinskej zdźělence. Najpozdźišo za 2038, po móžnosći hižo zašo, je kónc wudobywanja wuhla w Němskej wobzamknjeny. Dokelž LEAG njedźiwajcy toho z wottorhanjom twarjenjow pokročuje, žada sej Serbski sejm hnydomny moratorij, juristisce postajene wotstorčenje rozsuda, a zo měli město toho kónčiny rekultiwować.