Jury přinoški za literarne wubědźowanje 2021 tučasnje hódnoći
Budyšin (SN/pdź). „Namołwjamy wšitkich młodych pisacych so pjera jimać“, rěkaše w namołwje k lětušemu literarnemu wubědźowanju. Kóžde druhe lěto je Ludowe nakładnistwo Domowina a Załožba za serbski lud zhromadnje organizujetej. Hač do 31. oktobra su młodźi awtorojo a młode awtorki swoje teksty zapodali. „Młody“ w tym konteksće woznamjenja, zo njeje pisacy starši hač 35 lět a zo nima hišće žanu swójsku publikaciju. Zapodate twórby maja w hornjo- abo delnjoserbšćinje spisane być. Nimo toho njesmědźa dotal w nowinach, časopisach, knihach abo w interneće wozjewjene być. Tematisce njejsu pisacemu dorostej žane hranicy stajene. „Pisajće wo dźensnišim času, wo zašłosći abo wo přichodźe“, w namołwje dale rěkaše.