Poskićeja swoje spěwy mjeztym tež na streamingowych platformach

Budyšin (SN/pdź). Tačele, kasety, cejdejki, radijo – dźensa wšo to hižo njetrjebaš, chceš-li hudźbu poskać. Dosahaja šmóratko, słuchatka respektiwnje bluetooth-boksa a zwisk k internetej. Hižo něšto lět zajimcy hudźbu přewažnje digitalnje přez streamingowe platformy konsumuja. Spotify, Deezer a Apple Music wužiwa mnoho ludźi na swěće, wosebje młodźina. Tu namakaš spěšnje kóždy spěw, album abo playlist, kiž sej přeješ. Mjeztym so streamingowe platformy tež ze serbskimi twórbami pjelnja.