Serbske hudźbne wideja diskusiju w syći Łužycafilm zbudźili
Hudźbne wideja wukopachu so na lětušim Choćebuskim filmowym festiwalu (CFF) jako tuchwilu najwoblubowaniši žanr młodych serbskich filmowcow: Skupina Astronawt feat. Lil Handrij zdoby sej na filmowej přehladce z paskom „Brunica“ Spěchowanske myto Załožby za serbski lud, hiphopowa trójka Nowa Doba prezentowaše widejo „Schwientek G“, Kolektiw Wakuum předstaji we wobłuku sekcije „Heimat – Domownja – Domizna“ widejo „Čert“ a Kolektiw Klanki swoju druhu widejowu produkciju „Mróčele“. Tuž bě prawy wokomik, zo so tež syć Łužycafilm na swojej dźěłarničce z tymle tworjenjom zaběra. Dobry zakład za to poda rěčnica syće Sylka Polencojc-Laubensteinowa ze Załožby za Serbski lud z derje rešeršowanym přehladom dotalnych serbskich hudźbnych widejow. A čłowjek so dźiwa – tak młody, kaž zda so žanr w Serbach hladajo na nawal nowych produkcijow w běhu minjeneho lěta (tu mamy wosebje skupina Astronawt feat. Lil Handrij z wjacorymi přinoškami wuzběhnyć) być, wón docyła njeje.