Budyšin/Zhorjelc (SN/bn). Hornjołužiski festiwal komorneje hudźby je w minjenymaj lětomaj koncerty we wubranych hrajnišćach regiona, kaž su to na přikład hrody a cyrkwje, wuspěšnje wuhotował. Wot lětušeho rozšěrja swój poskitk z dorostowym projektom. Tak mjenowana Hornjołužiska komornohudźbna akademija ma přichodnje w dwulětnym rytmusu jako „kowarnja talentow za wulce wobdarjenych młodych wuměłcow“ ­słužić. Prěni raz přewjedu ju lětsa wot 18. do 21. awgusta na Minakałskim hrodźe. Kaž w zdźělence intendanta festiwala dr. Hagena W. Lippe-Weißenfelda dale rěka, budźe renoměrowany bračist Nils Mönkemeyer wuměłski nawod projekta wukonjeć. Jako partneraj akademije skutkujetej Drježdźanska wysoka šula za hudźbu „Carl Maria von Weber“ a Sakska hudźbna rada.