Wužiwać serbšćinu w zjawnosći je wobstajna tematika w skutkowanju Rady za serbske naležnosće Sakskeje. ­Wo wjacorych ćežišćach rěč nastupajo je so gremij wčera dorozumił.

Drježdźany (SN). Zapřijeće serbšćiny do digitalizaciskeje strategije Swobodneho stata Sakskeje a dźěławosć serwisoweho běrowa za serbsku rěč běštej předmjetaj, z kotrymajž je so sakska Rada za serbske naležnosće na swojim wčerawšim wuradźowanju w Drježdźanskim krajnym sejmje zaběrała.

Hłowne zaměry digitalizaciskeje strategije a wosebje staw zapřijeća serbšćiny do statnych digitalnych poskitkow je Thomas Popp, w statnej kencliji za digitalne zarjadnistwo zamołwity sekretar, gremijej rozłožił. Kaž z nowinskeje zdźělenki rady wuchadźa, Popp konkretnje připowědźi, zo chcedźa serbskej rěčnej wersiji centralneho zarjadniskeho portala „Amt24“ kaž tež sakskeho portala za wobdźělenje lětsa w lěću wozjewić. Rada podšmórny zakonske prawo Serbow, so w swojej rěči na statne instancy wobroćić móc, štož ma so dźeń a bóle tež po digitalnych pućach wobkedźbować.