Zwjazkowy kancler Scholz a ruski prezident Putin telefonowałoj

Moskwa/Berlin (dpa/SN). Zwjazkowy kancler Olaf Scholz (SPD) je po rozmołwje z ruskim prezidentom Wladimirom Putinom potwjerdźił, zo chce Němska ruski zemski płun, kaž w zrěčenjach dojednane, dale w eurach abo dolarach zapłaćić. „Wostanje při tym, zo dojednanje płaći“, zdźěli rěčnik knježerstwa Steffen Hebenstreit wčera w Berlinje. Putin bě Scholzej w telefonaće rozłožił, zo płaći wot 1. apryla zakoń, po kotrymž ma so ruski płun w rublach zapłaćić.

Při wšěm so za europskich zrěčenskich partnerow ničo njezměni. Přepokazanki su dale w eurach abo dolarach na rusku banku Gazprom móžne, kotraž njeje wot sankcijow potrjechena. Banka pjenjezy potom na ruble konwertěruje. Scholz bě Putina prosył, jemu tole pisomnje wobkrućić, Hebenstreit rjekny. Wo telefonat bě Putin prosył.

Krjeml bě do telefonata rozłožił, zo njesměło přestajenje přepokazankow za ruski płun na ruble k njelěpšinam za Němsku wjesć. Přestajenje na rubl njesměło „k pohubjeńšenju zrěčenskich wuměnjenjow za europskich kupcow ruskeho płuna wjesć“.