Wopyt prezidenta USA w Pólskej wobšěrnje analyzowany a wuhódnoćeny

Waršawa. Wopyt prezidenta USA Joewa Bidena minjeny kónc tydźenja w Pólskej je hač do dźensnišeho přewšo wažna tema w medijach susodneho kraja. Wosebje dokładnje analyzuja nowinarjo a komentatorojo narěč Bidena na Waršawskim hrodowym naměsće. Tola tež wšitke druhe podawki wopyta su jim wažne.

Po tym puću su Polacy zhonili, zo je so wopyt prezidenta USA z diplomatiskim misnjenjom započał. Poprawom měješe pólski prezident Andrzej Duda na lětanišću w juhowuchodnym Rzeszowje Bidena witać, kiž chcyše tam zaměstnjenych wojakow USA wopytać. Krótko po wotlěće pólskeho prezidenta z Waršawy pak přizjewi pilot techniski defekt. Mašina dyrbješe so do stolicy wróćić, hdźež Duda do druheho lětadła přelěze a tak pozdźišo hač Biden w Rzeszowje přizemi. Štož je Polakam fatalne, je zdobom pokazka na špatny techniski staw pólskich knježerstwowych mašinow.