Wustajeńcu „Party w 21. lětstotku“ w Serbskim muzeju wotewrěli

Budyšin (SN/CoR). Něhdźe 60 hosći je zastupowaca direktorka Budyskeho Serbskeho muzeja Andrea Pawlikowa wčera popołdnju na wotewrjenju tamnišeje wustajeńcy „Party w 21. lětstotku – tradicionalna słowakska parta w modernych mólbach“ witała. „Kak narodnu drastu młodej generaciji zbližić? Jako smy 2019 wustajeńcu ,Sorbian Street Style‘ přihotowali, smy přez płót hladali a kontakt k projektej nawjazali, kotryž směmy dźensa tu prezentować“, Pawlikowa rjekny. Přehladku „Party“ je mjeztym něhdźe milion ludźi na najwšelakorišich městnach swěta widźało. Tuchwilu předstajeja tamnu połojcu projekta w Dubaju. W Budyšinje je dohromady 21 wulkoformatowych originalow a 31 ćišćow tradiciju a modernu zwjazowacych mólbow-portretow młodych njewudatych žonow we wšelakorych słowakskich drastach widźeć.