Najebać horcotu sej něhdźe 6 000 hosći zbliska a zdaloka swjedźeń w Slepom lubić dało
Slepo (SN/JaW/CoR). Z finalom nimale wšitkich kulturnych skupin – wjacore dyrbjachu hižo wotjěć, wšako lětadła nječakaja, – su wčera na Slepjanskej nawsy swjedźenski kónc tydźenja składnostnje 750lětneho wobstaća wsy a 9. mjezynarodneho festiwala dudakow zakónčili. „Wutrobny dźak wšěm za wopyt a wobohaćenje swjedźenskeho kónca tydźenja. Dźak wuprajam wobdźělenym skupinam, zo je wšitko tak derje wotběžało tež z transferom a přenocowanjom w Běłej Wodźe, kóždy je kóždemu pomhał“, wuzběhny moderatorka a sobuorganizatorka swjatka Stefanie Bierholdtec.