Towarstwo Kreatiwna Sakska zdźěła rozprawu za kraj a Zwjazk
Zhorjelc (AK/SN). Swobodnje skutkowacy w kulturnym a kreatiwnym hospodarstwje trjebaja nuznje wjace wuměny nazhonjenjow a mjezsobneho splećenja. Jich hłowne problemy su fairne zapłaćenje, socialne zawěsćenje a towaršnostne připóznaće. To je facit wčerawšeho diskusijneho foruma ze sakskim ministrom za hospodarstwo a dźěło Martinom Duligom (SPD) w Zhorjelskim kulturnym centrumje Kühlhaus. Towarstwo Kreatiwna Sakska bě na rozmołwu přeprosyło. Mnozy zajimcy su na zarjadowanje pod hesłom „Samostatnje skutkowacy w kulturnym a kreatiwnym hospodarstwje – prekerna nuza abo wulka swoboda?“ přišli.