NSLDź pokaza 25 premjerow – Nowej serbskej, zdźěla mobilnej formataj

Budyšin (SN/bn). „Trjebamy kaž wšitke dźiwadła kedźbnosć. Swět je so změnił, a to nic na kóždy pad do dobreho směra. Hdźe pak, hdyž nic w dźiwadle, móžemy rozjimać, štož nas zaběra a hdźe hewak móhli so tež emocionalnje na wjacorych runinach do diskursa dać?“ Tak zahaji intendant Němsko-Serbskeho ludoweho dźiwadła Lutz Hillmann nowinarsku rozmołwu k zazběhej hrajneje doby 2022/2023 wčera w foyeru institucije.

Dohromady chcedźa w aktualnej sezonje 25 premjerow prezentować. Mjez wjerškami budu na přikład rejowanske dźiwadło „Bach Brasil“, inscenacija klasikarja „Ein Volksfeind“ Henrika Ibsena a prapremjera dotal prezencnje njepokazaneho krucha „Widerstand“ Lukaša Ričela.