Drježdźanjan Roland Schwenke, tež ­jako „Canaletto wysočiny“ znaty, je so mjeztym druhi raz swojeho pseudonyma hódny wopokazał. Wón je so z nowej twórbu na jedne ze swojich najlubšich městnow wróćił. Venedig – město lagunow a gondolierow – je jeho šěsć měsacow dołho wužadał.

Hinak hač jeho wuznamny přikład ­Giovanni Antonio Canal, njeje Schwenke na kromje přistawneho basenka a wo­srjedź mjerwjeńcy jednoho z najznaćišich naměstow lagunoweho města stał, ale w swojim ateljeju. Tutón ateljej je přetworjena dźěćaca stwa w platowym twarjenju w Drježdźanach-Gorbitzu.

Najebać to ma wón při rysowanju a molowanju, za čož je dotal wšědnje dwě do wosom hodźin nałožował, přeco kusk Venediga při sebi.

Jako bě w lěće 2010 při swojej druhej jězbje do sławneho italskeho města na Markusowym naměsće čwak njekruteho plestra wuhladał, bě jón sobu domoj wzał.