Serbski institut dźěła na přichodnej wersiji serbskeje předčitanskeje funkcije

Budyšin (SN/MiP). „Witajće w swěće rěčneje syntezy!“ Tutu serbsku sadu zasłyšiš na stronje předčitanskeje funkcije Serbskeho instituta, kliknješ-li na wothrawanski knefl. Za tym, za kotru rěčnu wersiju sy so do toho rozsudźił, praji ći to Juro w delnjo- abo Matej w hornjoserbšćinje. Tuta prěnja testowanska wersija, kotraž je wot januara kóždemu zajimcej pod: http://tts-juro-matej.serbski-institut.de zjawnje přistupna, „je wažny mjezywuslědk po puću k bjezbarjernosći w serbskej rěči“, podšmórnje direktor instituta prof. dr. Hauke Bartels we wotpowědnym online-wozjewjenju. Swobodny kraj Sakska projekt z dotal 700 000 eurami jako naprawu k spěchowanju inkluzije spěchuje.