Jednaćel: „Dźěłakmanosć zaručeć“, zawodna rada widźi „chutny strach“

Budyšin (SN/mb). Přichod Ludoweho nakładnistwa Domowina (LND) słuša do temow dnjoweho porjada posedźenja załožboweje rady jutře w Budyšinje. Tam póńdźe tež wo přiměrjenje mzdow při­stajenych LND niwowej druhich serbskich institucijow, zo by nakładnistwo we wubědźowanju wo personal samsne šansy měło. Hižo sobotu je serbski rozhłós MDR powěsć wo lisće zawodneje rady nakładnistwa wusyłał. W njej su prajili, zo so w LND „personalna situacija dale přiwótřa“. Z lista, kiž drje redakciji rozhłosa předleži, ale nic wjednistwu nakładnistwa, wuchadźa, zo „wopušći w aktualnym a přichodnym kwartalu šěsć dalšich sobudźěłaćerjow a sobudźěłaćerkow nakładnistwo. Wot spočatka 2022 bě LND hižo 15 ludźi zhubiło“, pisaja w lisće dale. Tež běchu připosłucharjo z po­hódnoćenjom konfrontowani, zo hrozy „chutny strach, zo njeje nakładnistwo hižo dźěłakmane“. Po měnjenju zawodneje rady su njedostatki wjednistwa na tym wina.