Debata wo wobchadźenju z Altenatiwu za Němsku po woprašowanjach

Berlin (dpa/SN). Hladajo na poměrnje wysoke wuslědki woprašowanjow za AfD je so předsyda CDU Friedrich Merz hišće raz jasnje přećiwo zhromadnemu dźěłu z tutej stronu wuprajił. W telewizijnym sćelaku ZDF won wčera wječor rjekny: „Dołhož sym předsyda CDU, žanoho zhromadneho dźěła z tutej stronu njebudźe.“ AfD je po jeho měnjenju antisemitiska a přećiwo wukrajnikam so měrjaca.

We wólbnym naprašowanju sćelaka ARD „Deutschlandtrend“ bě AfD naposledk ze 18 procentami runja tak sylna kaž SPD. Kónc tydźenja wozjewjene woprašowanje instituta Insa w nadawku nowiny Bild ma stronu, kotruž wustawoškit jako prawicarsko-ekstremistiski podhladny pad wobhladuje, ze 19 procentami za tohorunja tak sylnu kaž SPD. Wosebje dobre wuslědki ma AfD na wuchodźe Němskeje. Tak docpě wona při woprašowanjach w Braniborskej 23, w Sakskej 26 a w Duriskej samo 28 procentow. We wšitkich třoch zwjazkowych krajach wola klětu nowe krajny sejm.