Brüssel (dpa/SN). Europska komisija je nowe jednanje přećiwo Pólskej wjele diskutowaneho zakonja dla zahajiła. Tole su wčera w Brüsselu rozsudźili, rjekny wiceprezident komisije EU Valdis Dombrovskis w Brüsselu.
Konkretnje dźe w pólskim zakonju wo to, zo ma přepytowanska komisija pruwować, hač su mějićeljo zastojnstwa mjez 2007 a 2022 pod wliwom Ruskeje rozsudźili a tak wěstoće kraja zeškodźili. Kritikarjo so boja, zo móhł zakoń tomu słužić, nawodu opozicije Donalda Tuska do wólbow parlamenta w nazymje wočornić abo samo z politiskeho žiwjenja Pólskeje wuzamknyć.
Na kóncu tak mjenowaneho jednanja ranjenja zrěčenja EU dla móhła skóržba před Europskim sudnistwom a pjenježna pokuta stać. Dźensa chcyše komisija EU list z wotpowědnymi wumjetowanjemi pólskemu knježerstwu pósłać. Waršawa ma dwaj měsacaj chwile na to reagować.