Wurjadna synoda Europskeje bratrowskeje wosady wot jutřišeho wuradźuje
Ochranow (SN/at). We wuchodoněmskim městačku Ochranow móhli kónc tydźenja europskim cyrkwinskim stawiznam dalši kapitl přidružić. Prěni raz po pandemiji korony dla zeńdu so synodalojo a synodalki Europskeje kontinentalneje prowincy ewangelskeje bratrowskeje wosady (EBU) zaso wosobinsce a maja dalšeho biskopa resp. dalšu biskopku wolić. Nominowanski gremij je šěsć wosobow namjetował, tři žony a třoch muži. Tuž je prawdźepodobna šansa data, zo wurjadna synoda mjenowaneje prowincy tele zastojnstwo w Ochranowje prěni raz žonje dowěri.
