Kamjenskej měšćanskej knihowni Sakske bibliotekowe myto spožčili
Kamjenc (SN/bn). „Před lětom smy snano trochu wo wuznamjenjenju sonili. Hladajo na sylne polo konkurentow so ćim bóle wjeselu, zo so dźensa Sakske bibliotekowe myto 2023 w knihowni spožči, kotraž je wjace hač posrědkowarka wědy. Wona tomu přinošuje wutworić w Kamjencu a wokolinje klimu, kotraž je fairna. Dźakuju so předewšěm mustwu biblioteki za jeho wusahowace kulturne dźěło. Jeli nam Gotthold na swojej mróčeli runje přihladuje, čini tole zawěsće z posměwkom.“ Z tymle słowami powita wčera Kamjenski wyši měšćanosta Roland Dantz (njestronjan) hosći w měšćanskej bibliotece „G. E. Lessing“, wuzběhnywši mjez druhim zastupjerjow měšćanskeje rady a zapósłancow Sakskeho krajneho sejma Alojsa Mikławška a Jörga Markerta (wobaj CDU). Knihowni bu z 10 000 eurami dotěrowane myto mjez druhim za „bohaty program za wšitke generacije“ a poskitk „Open library“ z rozšěrjenymi wotewrjenskimi časami bjez dohladowanja přiznate.
