Hody lěta 2023 njeběch ze swojej swójbu doma kaž hewak přeco. Njejsym při božodźěsćowym štomje w dobrej stwě sedźała. Ale přebywach w Lipsku, w Domje Ronalda McDonalda.
Mój bratr Mato dyrbješe so w centrumje za chorosće wutroby zastarać. Tuž chcychmy jemu jako swójba blisko być. Bydlachmy tuž něšto dnjow w Lipšćanskim Domje Ronalda McDonalda. Tute domy su stajnje cyle blisko chorownje, w kotrejž lěkarjo chore dźěći lěkuja a hladarjo so wo nje staraja. Bliskosć swójby wšak proces hojenja schorjenych dźěći podpěruje. W Němskej je dotal 23 tajkich domow, w kotrychž předewšěm starši schorjenych dźěći přebywaja.
