Kulturny centrum Krabatowy młyn je wčera w Čornym Chołmcu swoju prěnju planowansku rozrěč kaž tež zhromadnu čitansku probu za nowe předstajenje z mjenom KRABAT-saga přewjedło. Prapremjera krucha budźe lětsa 19. junija na arealu Krabatoweho młyna.
Čorny Chołmc (SN/MiP). Nimo organizaciskeho teama su so dźiwadźelnicy kaž tež akterojo z dalšich wobłukow projekta – maski, kostima, hudźby a režije – wobdźělili. „Nimo wonkownych změnow na dobro lěpšeho gastronomiskeho zastaranja wopytowarstwa kaž tež wutwara publikumoweje tribuny, chcemy hladajo na wuměłske kriterije cyle nowe dźiwadłowe předstajenje poskićić“, piše Kulturny centrum Krabatowy młyn w nowinskej zdźělence. Wone z přerěznje 100 přihladowarjemi wjace na předstajenje liči.