Budyšin (CS/SN). Hłowne hesło žurnalista sćelaka ZDF Klausa Prömpersa we wobłuku Budyskich narěčow bě: „Zniča socialne medije demokratiju?“. Něhdźe sto zajimcow bě minjeny pjatk do Budyskeje Tachantskeje cyrkwje přichwatało, nadźijejo so wotmołwy na tute prašenje. Hnydom na spočatku pak rěčnik praji: „Ja so boju, zo haj.“

Socialne medije maja woprawdźe wjele mocy. Wone wotewru durje za desinformaciju, spionažu a sabotažu. Z tym móžeš demokratiju skóncować, bě sej Prömpers wěsty. Socialne medije su ekstremnym populistam móc skićili. „Bjez twittera njeby so Trump z prezidentom stał“, wo tym je Prömpers přeswědčeny.