Njedźelu njebě jenož dźeń dźěsća, ale tež dźeń swětoweho herbstwa UNESCO. Do toho słuša hižo 20 lět Mužakowski park. To su zašły tydźeń zastupjerjo Sakskeje a Pólskeje hódnje woswjećili.

Mužakow/Dippoldiswalde/Ochranow (SN/mb). Lětuši dźeń swětoweho herbstwa ma hesło „posrědkować, zwjazować, zahorjeć“. To so k Mužakowskemu parkej hodźi, kotryž je jedne z 54 městnow po cyłej Němskej, kotrymž su tónle titul spožčili. Wšako so na woběmaj bokomaj Nysy wupřestrěwa a z tym na přirodne wašnje Europu bjez mjezow symbolizuje – wosebje w času přiběracych kontrolow na mjezach mjez Němskej a susodnymaj krajomaj Pólskej a Čěskej. Wjele ludźi wuži ćopłe wjedro kónc tydźenja za pobyt w parku a w hakle njedawno wočinjenej nowej kofejowni we wudworje hrodu.