Błótowske powěsćowe nocy wospjet publikum wobkuzłali

Bórkowy (MaH/SN).  „Wukšadnjony pókład abo kak jo kulka do Błotow pśišła“, mjenuje Serbski ludowy ansambl (SLA) swoju lětušu inscenaciju w rjedźe Błótowske powěsćowe nocy, z kotrejž je wot minjeneje soboty do wčerawšeje póndźele na tři předstajenja dohromady něhdźe 4 000 wopytowarjow přiwabił. Na Hrodźe w Bórkowach zamóchu chór, balet a spěwni solisća SLA kaž tež hóstnej hrajerjej Božena Bjaršec a Marvin George publikum zahorić. Přihladowarjow njepřeswědčichu jenož wukony rejwarjow a dźiwadźelnikow, pisane kostimy a šěroki spektrum hudźby wot dźěćaceho spěwa přez musical hač k operowej ariji, ale tež dźakowano wuběrnej swětłowej technice wulkotnje skutkowace mystiske wobrazy. „Je so na kóždy pad zadaniło sem přińć“ wjeseleštaj so Frank a Anett Gerisch z Choćebuza. Tež Rüdiger Rupp a Irena Wawczyniak z Brjazyny, Sylke a Nante Neumann z Drježdźan a Kerstin a Jürgen Diettrich z Pirny dožiwichu „krasny wječor“.