Zhorjelscy Serbja zahaja serbske blido we wobchodźe labela LABA

Zhorjelc (SN/MiP). Serbja w Zhorjelcu změja w přichodźe składnosć, so w rumnosćach wobchoda modoweho labela LABA na Sohrskej dróze 17 na bjesadu zetkać. To je mějićel Gerhard Zschau njedawno na internetnej stronje swojeho wobchoda wozjewił. Mjez druhim piše tam, „zo je dawno hižo znate, zo w našim wobchodźe tež serbsce rěčimy „. Na to je wón hordy, „wšako njeje to zwonka serbskich srjedźišćow Budyšin, Wojerecy abo Chrósćicy samozrozumliwe“.

Prěnje serbske blido wotměje so tam přichodny pjatk, 18. julija, w 17 hodź. „Zarjadowanje chcemy prawidłownje na pjatkach we wotstawku dweju do třoch tydźenjow dale wjesć. Terminy podamy na našej internetnej stronje“, powěda Gerhard Zschau w rozmołwje ze Serbskimi Nowinami. „Poprawom wšak smy hižo dwě njeoficialnej serbskej blidźe, móhłrjec jako test, w našim wobchodźe přewjedli“, přiznawa wón a doda, zo je so dohromady dźesać zajimcow zešło.