Wuměłstwo, rjemjesło a kreatiwita zwjazuja wobdźělnikow 19. mjezynarodneje rězbarskeje dźěłarnički w Miłočanskej skale. Dwě njedźeli je dźewjeć wuměłcow z cyłeho swěta w kreatiwnej zhromadnosći dźěłało. Su swoje ideje do drjewa a wšelakich družin kamjenja přeměnili a cyle rozdźělne skulptury zhotowili.

Miłoćicy (lcm/SN). Hižo šesty raz je so čěski rězbar Robert Alger na mjezynarodnej rězbarskej dźěłarničce w Miłočanskej skale wobdźělił. Lětsa wěnuje so wón zornowcowej skulpturje, kotraž nosy titul „Słónco a měsačk – Johann Schadowitz a jeho rapak“. Ze swojim dźěłom chce Alger realnu figuru Johanna von Schadowitza počesćić, kotraž je hač do dźensnišeho wusko z Łužicu zwjazana. Poprawom znata powěsć wo Krabaće mnohich do raja bajkow wjedźe – Čecha pak chce Schadowitza w pozitiwnym, realnym swětle pokazać. Mjenujcy jako wosobinu, kotraž tež zwonka mytow wuznamnje skutkowaše. Tohodla njepředstaja jeho jako starca, ale muža srěnjeje staroby: nazhonity, skerje prašejo a wobkedźbujo.