W cyrkwi Marije a Marty w Budyšinje wotmě so tydźenja koncert składnostnje 80. róčnicy kónca Druheje swětoweje wójny. Ze swojim programom „Zo njech dobra Němska kćěje ...“ prezentowaše ­dujerski kwintet Opus 45 zhromadnje z w Budyšinje rodźenym dźiwadźelnikom Romanom Knižku hnujacu hudźbnu hommage na stawizny, kotraž drje mnohim připosłucharjam hišće dołho w pomjatku wostanje.

W srjedźišću zhromadneho projekta třoch Budyskich gymnazijow – Friedricha-Schilleroweho, Philippa Melanchthonoweho a serbskeho gymnazija – steješe ­hesło „Dopominanje, napominanje a nadźija“. Před 650 šulerkami a šulerjemi Opus 45 skutkownje pokaza, kak ­zamóže hudźba dopomnjenki zachować a mosty mjez zašłosću a přitomnosću twarić. Wobsahowe ćežišćo koncerta bě kónc wójny w Budyšinje, štož so w tekstach nazornje tematizowaše. Roman Knižka čitaše z wulkej intensitu z dźenikow, listow a rozprawow časowych swědkow wo poslednich wójnskich dnjach w swojim ródnym měsće Budyšinje, z čimž spožči programej přidatnu emocionalnu a rozswětlowacu dimensiju.