SC 1911 Wulke Rědorjecy – SJ Njebjelčicy 0:3 (0:2)
Zestawa SJ Njebjelčicy: Tietze – Scherwinski (67. Lehmann), Wjerš, Hrjehor, Korjeńk, Cyž, Schulze (79. D. Wuschansky), Plaettner, Rudolf, F. Domš (83. G. Čornak), O. Domš
Skónčnje Njebjelčenjo po štyrjoch hrach bjez dobyća zaso raz dypkowachu. Hačrunjež běchu wuhlady najprjedy raz špatne: Trenarjej Danielej Pohlingej steješe jenož dźesać hrajerjow k dispoziciji. Mjez nimi běchu tež někotři zlochka zranjeni. Bohudźak pak móžeš so přeco hišće na toho abo tamneho stareho zajaca spušćeć. A z tym bě sej wěsty, zo njebudźe kwalita woteběrać. Friedrich Tietze, kotryž zastupowaše wrotarja Nica Hahna, kóždy bul dźeržeše. Tež Dirk Wuschansky a Gabriel Čornak dawaštaj dobre impulsy wot ławki. Nowy w mustwje bě na tutym dnju tež Bennet Scherwinski. 18lětny dorostowy kopar hraješe hnydom wot spočatka sem a hraješe jako prawy škitar solidnje.
