Najwyše wuznamjenjenje Měrćinej Weclichej – spěchowanske myto Julianej Nyči
Smochćicy (SN/mb). W přitomnosći něhdyšich lawreatow, přećelow lětušeju wuznamjenjeneju a wosobinow zjawneho serbskeho a regionalneho žiwjenja, mjez nimi zastupowaceho Budyskeho krajneho rady Swena Nowotneho, je Barbara Klepsch, sakska ministerka za kulturu a turizm, Myto Ćišinskeho spožčiła. Julianej Nyči přepoda najprjedy Spěchowanske myto Ćišinskeho, Měrćinej Weclichej po tym Myto Ćišinskeho. Předsyda załožboweje rady Marko Kowar je při powitanju na swjatočnym zarjadowanju sobotu popołdnju w Smochčanskim kubłanišću swjateho Bena na to skedźbnił, zo běše to 15. spožčenje najwyšeho serbskeho myta po přewróće.
