Awtor dźensa
Andre Strelow
Pod hesłom „Ralbičanscy stari knježa a Dukla do toho!“ steješe minjeny kónc tydźenja cyle w znamjenju sporta, zhromadnosće a dobreje nalady. Po dobyću mišterstwa ćehnješe starych Ralbičanskich knjezow wot soboty do njedźele do złoteho města Prahi. Dźakowano wuběrnej organizaciji Bosćija Bjeńša a Jana Hrjehorja nastaji so nimale dwaceći Ralbičanskich hólcow na puć do čěskeje stolicy. Start běše sobotu rano: Zahe zetka so mustwo při Ralbičanskim stadionje „Jurij Frencl“, zo by zhromadnje jězbu k susodam nastupiło. Po přijězdźe do Prahi započa so mustwowy dźeń ze zhromadnym wobjedom, při čimž hižo dobra nalada knježeše. W 14 hodź. steješe potom sportowy wjeršk na programje: hra koparskeju klubow prěnjeje ligi Dukla Praha a Mladá Boleslav. W hrajersce słabej zetkance přesadźi so Mladá Boleslav snadnje 1:0. Najebać špatnu hru bě rjany stadion woprawdźity wjeršk: Atmosfera bě swójbna, bjez wysokich płotow abo přehnatych wěstotnych naprawow.
