ST Viktoria Worklecy 92 –

VfL Pirna-Copitz 3:2 (25:23; 16:25; 23:25; 25:15; 24:22)

Zawěsće najćeša hra dotalneje sezony čakaše na druhim domjacym hrajnym dnju na młodych dźiwich z Worklec. Mustwo z Pirny je loni nimale wšitke hry dobyło a minjenu hrajnu dobu na druhim městnje zakónčiło. Z tym běchu jasny faworit. Za domjacych pak tuchwilu derje běži, tak, zo so tež tajkeho nadawka njenaboja.

Tuž startowachu hnydom zmužiće do prěnjeje sadźby a překwapichu hosći ze sylnymi nadaćemi a spěšnymi nadběhami. Na tamnym boku njejsu hišće prawy rytmus namakali. Dwě dołhej seriji nadaćow Józefa Krawca a Šćěpana Wjeńki staraštej so wo komfortabelny předskok wosom dypkow. Poprawom jednaše so nětko jenož hišće wo formalitu. Tola hosćo nachwatachu hnydom sydom dypkow za sobu a tak skónči so prěnja sadźba snadna 25:23 za domjacych.