Twarske róšty a kran na Kurta Pchalekowej 20 do 26 w Budyšinje hižo dlěši čas na to skedźbnjeja, zo so tu domske na moderne, dźensnišemu standardej wotpowědowace bydlenja přetwarjeja.
We 1980lětach je so na prózdnym městnje wot zachoda bywšeje kofejownje Serbskeho domu na Pchalekowej hač ke Brigadnemu domej eksperimentelny twar (Serie WBS 70) natwarił. Nětčiši přetwar tehdom moderneho twara kaž tež Brigadneho domu je planowała a přewzała Budyska bydlenjotwarska towaršnosć (BWB). Z přetwarom nastanje 26 dwu- do pjećrumowych bydlenjow, kiž změja 55 do 100 kwadratnych metrow. Za stare twarjenje Brigadneho domu su předwidźane štyri bydlenja, na kóždej etaži jedne. Wšitke bydlenja budu z liftom přistupne a z balkonom wuhotowane. Z balkona skići so nowym wobydlerjam wuhlad na dwór Serbskeho doma a snano zhonja wo powójnskich stawiznach Serbow na tutym městnje, konkretnje tež wo nastaću a wužiwanju Brigadneho domu.
Dom w běhu jednoho lěta nastał
