Hudźbno-literarny wječor na česć wusahowaceje delnjoserbskeje awtorki

Budyšin (SN/bn). We wobłuku rjadu „Zynki a linki“ je Serbski ludowy ansambl wčera hudźbno-literarny wječor na česć Miny Witkojc składnostnje jeje 50. posmjertnin wuhotował. Smyčkowy kwartet SLA zahaji zarjadowanje pod hesłom „Kwěćel z błótowskich łukow“ z kompoziciju „Serbska sada za smyčkowy kwartet“ Bernda Weinreicha. Slědowaca twórba „Gaž wětšyk dujo“ Bjarnata Krawca, złožowaca so na baseń wusahowaceje delnjoserbskeje spisowaćelki, zaklinči we wobdźěłanju Jana Cyža. Wotpowědnu lyrisku předłohu „Na wětšyk“ recitujo powita dźiwadźelnica Hanka Rjelcyna snadnu horstku wopytowarjow – cyłkownje přiwabi program jenož dźesać zajimcow do Budyskeje Röhrscheidtoweje bašty – a předstaji jednotliwych hudźbnikow, kotrychž nawjedowaše huslerka Hong-Huei Lin. Hesło wječora bě po słowach Rjelcyneje, kotraž njezaběra jenož rólu recitatorki, ale skutkowaše zdobom jako moderatorka, dwójna pokazka na bio- a bibliografiju počesćowaneje awtorki.