Meditacija „Genezis 2.0“ wopytowarjam swětoznatu mólbu zbližiła
Chrósćicy (SN/MG). Wjerch Sixtinskeje kapale we Vatikanje je swětoznaty. Zašłu sobotu mějachu ludźo składnosć, sej jón w serbskej Łužicy wobhladać. Instalacija „Genezis 2.0“ bě tole we wosadnej cyrkwi w Chrósćicach zmóžniła. Ju běchu wosebje w spominanju na njeboh jednaćela Serbskeho šulskeho towarstwa Andreasa Ošiki zarjadowali, wšako bě wón iniciator tajkich projektow pod hesłom „adventure tours“. Dohromady štyri króć su zawčerawšim nawječor a wječor něhdźe poł hodźiny trajacu projekciju na wjerchu Božeho domu pokazali.
Za wobsah bě student medijoweje produkcije Bosćan Donat zamołwitosć přewzał. Chróšćanska wosada je projekt sobu podpěrała a rumnostnje zmóžniła.
