Zwjazk ratarjow Braniborskeje žada sej zasahnjenje politiki

Podstupim (dpa/SN). Prezident Zwjazka ratarjow Braniborskeje Henrik Wendorff kritizuje masiwne zniženje płaćiznow we wobchodach a wočakuje dalši ćišć na ratarske zawody. Zniženje płaćiznow za jednotliwe wudźěłki wo 40 procentow njehodźi so z chabłanjom na wikach wopodstatnić, rjekny wón powěsćerni dpa w Podstupimje. „Za tym chowaja so poskitki, kotrež maja kupcow přiwabić.“ Bitwy wo najtuńšu płaćiznu z pomocu wabjenskich łopjenow w póstowym kašćiku njejsu hižo načasne, Wendorff rjekny.

Braniborske ratarske a zežiwjenske zawody prezentuja so wot 16. hač do 25. januara w swójskej hali na Zelenym tydźenju w Berlinje. W srjedźišću steji tradicionalnje kopica kulinariskich chłóšćenkow k woptawanju. Mjezynarodna ratarska přehladka zhladuje 2026 nimo toho na swoje 100lětne wobstaće.