Domojnik/domojnica najwoblubowanišej serbskej zapřijeći

Budyšin (SN/bn). „Domojnik/domoj­nica“ je Hornjoserbske słowo lěta 2025 (HSSL). Wopřijeći wopisujetej wobdźělnikow rěčneho projekta Domoj, kotryž je syć za serbsku rěč a regionalnu identitu ZARI lětsa prěni raz wuhotowała. 22 z dohromady 145 wothłosowacych – porno lońšemu lětu je to jasny minus něhdźe 30 procentow – je so za tónle terminus rozsudźiło. Na druhim městnje slěduje ze snadnym wotstawkom jenož dweju hłosow kandidat „słuchožračk“, kotryž bu jako serbski ekwiwalent němskemu „Ohrwurm“ namjetowany. Podest wudospołnja z 15 wotumami „darnička“, w kotrejž chowaja so trjebane nastroje, hrajki abo drasty, kotrež su „přeškoda za wotpadki“. Jenički pobrachowacy hłós je tomu zadźěwał, zo by so třeće městno dwójce wobsadźiło – „sotrowšćina“ pak ma runja načolnej trójce potencial, so dołhodobnje z krutym wobstatkom ertneje kaž tež pisomneje rěčneje praksy stać, wšako wujewjeja wuslědki přełožowanskeje aplikacije „sotra“ častodosć konstrukty, kotrež sej swójsku klasifikaciju bjezdwěla zasłužeja.