zestajała Marka Cyžowa
JANUAR
3. januara: W Serbskich Nowinach wopominaja njewšědnje wobdarjeneho stawiznarja a chronista dr. Erharda Hartstocka, kiž je 30. nowembra 2024 zemrěł. Rodźeny 1939, bě wuznamny slědźer wo serbskich a łužiskich stawiznach. Po studiju na Lipšćanskej uniwersiće promowowaše 1969 a skutkowaše wjele lět w archiwnistwje, mjez druhim jako nawoda Budyskeho statneho filialneho archiwa a w Sakskim statnym archiwje Drježdźany. Z jeho smjerću zhubi Łužica wusahowaceho stawiznarja a zachowarja regionalnych stawiznow.
4. januara: Z nowolětnym koncertom we wupředatym hosćencu „Meja“ w Radworju zahaji chór Meja swoje swjedźenske lěto k 130lětnemu jubilejej. Předstaji wot něhdyšeho nawody chóra Jurja Winarja zestajany, najskerje dotal hišće ženje njezaspěwany program „Pilnje dźěłaj, wjes’le spěwaj“. Pokazku ze spěwanjom, instrumentami a lóštnej moderaciju chcedźa na dalšich městnach poskićeć. (ZSSW)
