W Sakskim kontaktnym běrowje w Praze nowolětne přijeće wotměli

Praha (SN/LuNo). Kaž mjeztym hižo dźesać lět je Sakski kontaktny běrow (SKB) w čěskej stolicy Praze tež lětsa swoje nowolětne přijeće wuhotował. Póndźelu, 12. januara, zetkachu so w Serbskim seminarje ludźo, kotřiž so w Sakskej a Čěskej wo wzajomne poćahi na politiskim, hospodarskim, wědomostnym, kulturnym abo wuměłskim polu staraja. Tež wjednistwo Serbow bě kaž kóžde lěto přeprošene. Lětsa zastupowaše je jednaćelka Domowiny Judit Šołćina a referent Clemens Škoda, kotryž je w zarjedźe za wukraj zamołwity. Mjez hosćimi běštaj tradicionalnje tež Praski korespondent ARD, Serb Danko Handrik, a senator Jiří Vosecký, kotrehož serbska mać bě po Druhej swětowej wójnje do Čěskeje emigrowała. Přitomny bě lětsa tež bywši nawoda běrowa Dr. David Michel, kotryž tučasnje wšitke sakske kontaktne běrowy we wukraju nawjeduje.