Třeći dźěl serbskich načasnych oratorijow brigada w septembrje předstaji

Budyšin (SN/MiR). „Wulkotna woda“ je titul moderneho oratorija, kotryž změje za wosom měsacow, lětsa w septembrje, swoju premjeru. Wčera připołdnju su komponist a lawreat Myta Ćišinskeho Měrćin Weclich, lyrikarka Róža Domašcyna, kotraž je libreto napisała, fotograf Maćij Bulank kaž tež hudźbnik a aranžer Johannes Gerstengarbe čłonam chóra 1. serbskeje kulturneje brigady produkciju předstajili. W awli Budyskeho Serbskeho gymnazija knježeše wosebje mjez čłonami chóra napjatosć a wćipnota. „Wjeselimy so, čujemy so česćeni a smy jara dźakowni za to, zo směmy dalši oratorij předstajić“, rjekny serbska gymnaziastka Madlenka Cyžec hosći witajo.